2014年2月3日星期一

過期大佬3●完(漫畫+音樂跨媒體江湖連載創作文本)

1.3 「超級病態賭徒」VS「超級病態賭徒」

「人生本來就是一場賭注…」

「人生一切都是賭,唔敢賭,就咩都冇!」

「人生有很多事都是徒勞無功,唔賭,點知有冇運行!」

查實,呢幾句嘢只係賭仔的藉口而已。

曾經,我都係一名病態賭徒…依家,換個角度做「艇仔」,見到成班師奶、麻甩佬、阿伯、新移民…一個又一個買波,諗返起N年前自己都係咁On 99

點解有攞正牌開賭嘅唔幫趁,偏偏要同「艇仔」買?好很簡單,因為一個字…

貪!

貪,「艇仔」場場開亞洲盤(即讓球盤),以為命中率會提高;貪,「艇仔」有折頭,而且有啲仲可以月結。

不過咩理由「貪」都好,任何賭仔都會犯上一個通病,之唔係以為自己「一定會贏」咯!

冇諗過自己會輸,輸咗又點,冇錢又會點…等等。

如果將呢份咁執著的信念,用嚟做其他事,例如話:跑馬拉松咁樣,相信好多賭仔都各自獨當一面,做出輝煌成績。就算冇咁誇,至少都唔使賭到冇錢開飯啩!

日日有波賭,中正賭仔無止境的慾望,呢個唔只係賭仔的本性之一,更加係加速貧窮的原因。

正所謂,賭的態度如何,生活也必如何!

大多數賭仔嘅病態賭徒,離不開以下公式:

賭→輸→冇錢→窮→諗方法「搵」錢→ 控制唔到又賭→輸/贏→冇錢/有啲錢→窮/將贏嘅再賭→諗方法「搵」錢/將贏嘅再賭→ 控制唔到又賭→輸→冇錢→窮→諗方法「搵」錢→ 控制唔到又賭→輸/贏→冇錢/有啲錢→窮/將贏嘅再賭→諗方法「搵」錢/將贏嘅再賭→ 賭…

如此類推,係咁上下,贏贏輸輸,輸輸贏贏,但重點係:賭=窮!

尤其是一出糧就冇晒錢果啲,返工食飯撘車冇錢,一個窮樣。

身邊啲人會好奇怪,明明有份工,但點解唔夠錢食飯撘車呢?明明老公有俾家用,但點解餐餐食飯都冇餐好餸呢?乜香港啲物價真係咁貴咩?

賭到嚴重地影響生活,已經冇計極度影響身邊人了。

再者,我做「艇仔」期間,發覺好多師奶、麻甩佬、阿伯、新移民…都會On 99犯下一個致命嘅錯誤:

輸咗會追下一場波,而且亂9咁買,角球大細、首名入球、波膽…等等刁鑽又命中率低嘅彩池,貪倍率高、貪好分,其實仲難中過圍骰,尤其是當愈輸愈冇本錢時候,再9買,大多99輸。

仲有,唔明啲師奶點解淨係識巴塞、皇馬、曼聯、車仔,見親都買名牌,唔理主Win倍率係1.11,定係名牌球隊讓「兩球半/三球」呢啲辣盤,照買可也,而九成九都係贏粒糖,輸間廠,賭嚟為乜?

就係因為做過「艇仔」,機緣巧合走過外圍世界,曾經係「超級病態賭徒」嘅我,見盡更多On 9級數嘅「超級病態賭徒」。

換個角度睇清楚賭仔世界,已經令我決定戒賭,儲夠一筆之後,我就同20返佢鄉下開間小食店,叫做自己生意仔咁咯!

旺角哥冇啦,依家香港唔同晒啦,尤其我呢啲過期大佬,有西生存空間咩!依家喺舖仔日頭搓麵粉,夜晚返屋企就搓20對波,平平淡淡悶悶哋過吓人生有乜唔好先?


過期大佬(完)