新專輯校對第10次……

校對嘅嘢有時好邪（唔係清明講鬼故）……
明明睇完又睇幾次、改完又再改錯字，但偏偏點改點睇都仲有錯漏。
好彩嘅，印刷或出街前見到，再改埋；Well…時運低嘅話，明明校對咗10,000次，出咗街依然有錯。
所以，嚟緊將會推出嘅地底樂團新專輯，雖然已經校對咗10次、改完又改好似無間地獄咁，不過依然唔放心。第11次校對嘅任務，就交俾專業嘅朋友睇睇，先至放心！
好多嘢有今生冇來世，就算只係出隻冇咩人買、接近零銷量嘅地底樂團新作品，一樣唔可以求求其其Hea住校對一、兩次就算，盡力而為做到最好先見人。
因為，根據上隻專輯經驗，即使Plan好晒出咩新碟新EP新專輯、同咩合作單位傾好晒都好，硬係會有啲意外有啲問題有啲困難影響進度（容後有機會再喺《關於地底樂團…想說的二三事》分享點解咁Q耐先出到一隻新碟）；所以，依家抱住「可能係地底樂團最後一張專輯」（其實亦好大機會係）去做，今次應該唔使再相隔10年先出新嘢啩（雖然冇咩人會Care，So What？）！