點解有個咁柒嘅中文名叫地底樂團？
咳…即係咁，首先中文名嘅嘢，柒與否真係見仁見智。
當年未搞地底樂團之前，本人有個口頭禪叫「地底」，意思即係冇乜口德咁話人由行為至講嘢唔正路（同依家啲人講「離地」相似），咁樣樣都未係住。
後來1998年開始好Hea咁學人搞《Pick》，寫埋啲古怪又唔好睇嘅小說，虐待人哋對眼之餘仲未夠，又諗埋啲以為好前但其實好普通料嘅「小說原聲大碟」，就咁樣搞咗舊嘢叫Underground，連公司名都係叫「Underground地底」（當年有收過本人卡片嘅記得嘛）。
直到1999年7月出《Pick》CD+小說，至同一年12月出《Route
to indie》（獨立音道）合輯，一路都係叫Underground。
之不過，去到好聽啲叫「暫休」，直接講係重組嘅時間。由頭嚟過，又因為屎忽痕將《Pick》CD+小說其中兩個角色再發展成為另一個新故事，索性將Underground中文名叫埋做地底樂團，用意係配合返成個故仔入面嘅虛擬樂隊，所以小說版又好、漫畫版都好，呢舊興趣小組亦好，便便便他媽的叫Underground地底樂團吧！
P.S.
如果大家玩完手機、瞓唔著又冇嘢做，無聊到諗起香港有個興趣小組叫地底樂團，而又有啲嘢想問想知，歡迎Email/FB留言等途徑提出。
如果本人玩完手機、瞓唔著又冇嘢做，係會作出回覆，應該唔使好似地底樂團出新碟咁等幾年，啩！
沒有留言:
發佈留言