外賣祥伯的絕世點子 @ 地底樂團3連載小說

好肚餓…

好肚餓…好肚餓…

好肚餓…好肚餓…好肚餓…

好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…好肚餓…

@！好肚餓呀！

窮，可以有骨氣。但窮卻令人在今時今日的香港已沒有選擇了！

真後悔為了$24一個廉價飯盒加送一杯凍飲，我要折磨自己的肚皮。

胃部正磨著胃部，我只能以吞嚥唾液來抵抗饑餓。

「我係6樓A1室，兩個幾鐘頭前嗌咗個滑蛋牛肉飯、凍奶茶少甜多奶，請問送咗未呀？」我強忍怒火，嘗試平心靜氣地與茶餐廳的老闆娘了解情況。

「唏！撞鬼你咩！我認得你啦！6樓嗰個阿Key呀嘛，打咁多次嚟把鬼咩！都話送緊咯！」老闆娘解答完之後忘記了掛好電話，我聽到她已破口大罵：「挑那星，祥伯又送咗D外賣去邊呀？上次叫佢送去對面馬路，佢就送咗去元朗大馬路，搞到送個茶餐A要去差館接佢走。今次叫佢送上樓，六層樓梯咋，唔係送咗去陸羽吓？呢度佐敦嚟……」

X　　　X　　　X　　　X　　　

兩小時零三十八分鐘前，距離茶餐廳約一條街的舊式大廈。

「唔該！唔該！唔該！開開門呀！」外賣祥伯按完大閘門鈴後，不停拍打玻璃門。

阿伯如此驚人的舉動，令剛考獲牌照的新入職管理員先生頓時無名火起，禁不住大聲喝道：「咪開咗門俾你咯，阿伯！拉呀，拉呀，拉呀，你識唔識開門呀？」

祥伯被管理員言語上的不禮貌對待，第一個反應就是板著臉，接著口中唸唸有詞，好像說著一連串流利的港式粗言……

祥伯突然站在升降機門前，頭向左急轉，問管理員：「喂！5樓I1室邊度呀？」

管理員嘗試控制情緒回答：「你首先伸出右手按𨋢掣，𨋢門打開就入去，再按5字，上到5樓向右手邊行，第5個單位再入，你會見到一排劏房，再向左邊數第5間就係啦！」

電梯來到五樓了！可是祥伯忘記了究竟是左邊行？還是行完再數右邊第五個單位，接著他又忘記了究竟是送去五樓哪個單位…

於是，祥伯做了一個決定，而且他相信是最明智的決定。

祥伯逐個單位按門鐘，有人應門就問：「係咪你叫外賣呀？」如沒門鐘的單位，他索性邊大力拍打鐵閘邊問：「係咪你叫外賣呀？」

長長的走廊，少說也有十多二十個一開四、五或九的劏房獨立門口，祥伯心想這樣下去並不是法子，腦筋急轉彎之下，他又想出了絕世的點子……

「有冇人叫外賣呀？」祥伯站在走廊中央用盡全身的氣力叫喊。

叫了大約五、六分鐘，他感到喉嚨有點沙啞，心裡更加混亂，情緒又不停高漲，無可奈何地、情不自禁地說了一大堆流利的港式粗言。

忽地，其中一個單位的門徐徐打開，一個中年男人帶著莫名又驚訝的眼神走近祥伯，抖震的雙手緩緩地放在他肩膀上，「師傅！」

祥伯抽起手上以白色膠袋載著的滑蛋牛肉飯與凍奶茶少甜多奶，問：「係咪你叫外賣呀？」

「師傅，我係Jam呀！」男人說。

祥伯回答：「邊個仆街叫果Jam多呀？」

（未完待續）
＊ Jam，Underground樂隊第二代結他手；祥伯＝祥叔，Mad及Jam結他師傅 ＊
（詳見《Pick》CD小說）